السبت، 28 فبراير، 2015

#يوميات_فى _مترو_مصر



المترو دا مش وسيلة مواصلات وبس لا دا وطن وطن لناس ملهاش غيره وطن لناس مبتركبش غيره يوميا واحيانا فى اليوم حوالى اكتر من مرتين تلاته تقريبا انا بركب المترو من موسم 2001 _ 2002 ايوة موسم دا بقى كان موسم السقيع "الثانوية العامة " وسنينها الجميلة المهم مش موضوعنا الموضوع ان انا هحاول اوصل صورة عن عالم #مترو_مصر حضرتك اول ما هتركب المترو هتحس بالدفى اجبارى وممكن توصل لحد انك تعرق كمان هاتلى بقى مواصله فى البلد بتحسسك بالدفى دا يعنى فى الشتا مبتحسش بحاجة وفى الصيف متلبسش اى حاجة وانت جاى تركب "متلبسش اى حاجة بتحرر " هتركب المترو هتلاقى تصنيفات لناس يمكن عمرك ما قابلتها فى الشارع او فى مواصله فوق الارض يعنى لانهم معظمهم بيعتمد عليه كوسيله مواصلات هتلاقى اللى بيقرأ قرأن فيه اللى بيقرأ فى سره وفيه اللى بيقرأ بصوت عالى وطبعا الحاجة الجميله اللى فى الموضوع انى بلاقى شباب كتير من ضمن الصنف الاول دا ..., وفى صنف تانى دا بقى صنف التعبانين والشقاينين بجد هتلاقى ناس كبيرة وصغيرة بيغلبها النوم هتلاقى طفل زنان هتلاقى ام غلبانه واب غلبان هتلاقى شباب بيكون نفسه وطالع عينه وهتلاقى مجموعة رغايين ونمامين وستات بتركب فى عربية الرجالة عشان الرجالة جدعان وبيقوموا يقفوا ويقعدوهم وهتلاقى واحدة ماسكة الباب فى عربية السيدات عشان المترو ميمشيش لان فى راجل راكب معاهم هتلاقى شباب بيعاكس وهتلاقى شباب جدعان ردوا وقالوا ميصحش  هتلاقى بنات بتضحك وبنات شايله هم مين تعبان عندها و بنات هيمانه عشان حبيبة قالها كلمتين حلوين و هتلاقى الضحكة او الزعل بيصرخ من جوا كل واحد او واحدة واقف فى المترو زى بالبلدى كدا نص بيضحك والتانى زعلان هتلاقى بياع طالع معاه شهادة جامعيه بيبيع " ايوة يا حضرات بصلى وركز فى العرض الجامد معايا مقوار يقور جميع انواع اى حاجة عايزة تتقور والتلاته بـ5ـــ خمسه " وهتلاقى التانى " ايوة ايوة ايوة ياباشا ايوة يا مودام معايا لعبه لحمادة ولعبه لليلى لعبه العيد مسدس بالطلق بتاعه والاربعه بـ10ــ عشرة " وهتلاقى واحد " سلى نفسك يابيه  سلى نفسك يا انسة معايا لبان وعسليه سادة وبسمسم ومناديل واى  حاجة بـ1ــ بجنيه " وهتلاقى غيرهم وغيرهم وبيبوعوا كل حاجة حتى كروت الشحن وهتلاقى البنت الصغيرة او الولد الصغير اللى طالع او طالعه بيوزعوا مناديل او لبان على رجل كل اللى قاعدين ويجى اللى فيه النصيب بقى "

فى المترو هتلاقى حاجات غريبة بتحصل حاجات تضحكك من القلب انك تلاقى بياع طالع بيبيع صفافير واول ما طلع قال " استغفر الله سامحنى يارب .... معلش يا جماعه انا طالع ابيع صفافير بتصفر لواحدها يعنى لو بتنادى على صاحبك متتعبش نفسك وصفرله لو بتربى حمام فوق السطح صفرله بيها " وهتلاقى مترو ماشى على مهله ومترو عطلان وهتلاقى سواق ساب المترو فى المحطة وقفل الباب على الناس واقف ليه مستنى مترو الناحيه التانيه ليه اصل خايف لا يخبط فى اللى جاى بالمناسبة المترو اتعمل فى مصر لوى دراع عشان الفرنسين ميسحبوش توكيل بيجو من مصر وقعدوا من سنه انشائة لحد مش عارف سنه كام بياخدوا حوالى 60 % من الارباح وساعتها التذكرة كانت بــ 50 قرش واول ما المصريين حطوا ايدهم عليه قالوا يعوضوا الفترة دى رفعوا سعر التذكرة لــ75 قرش  وحبه وخلوها بــ 1 جنيه حتى الان طبعا بس كنت سمعت انهم هيغلوها عشان بيقولوا هيسمعوه الناس موسيقى احلى حاجة فى ادارة مترو مصر انهم بياخدوا وسائل الترفيه من ادارات العالم بس مش بياخدوا الجوانب الكويسة زى مثلا معالجة ان السواق بيمشى على مهله زى ان المترو بيتاخر اصلا زى ان الموضوع جميل اوى فى اى مترو تانى الا مترو مصر وبجد الحاجة الوحيدة فى مترو مصر ناسه اللى بتركب فيه بس تلاقى شباب تبص فى وشهم تلاقى امل لبكرة ويركب غيرهم يشتمواتنسى الامل اللى كان عندك وتستغفر ربك و تلاقى شباب طالعه تلعب اى لعبه وساعتها ترجع عمرك لحد ما كنت صغير " صلح , ثبت صنم " وغيرهم بس دول اللى حضرتهم  وتلاقى اللى بيتكلم فى السياسة و تلاقى اللى بيتكلم فى الكورة وتلاقى اللى بيشكى حال البلد بس الناس كلها بتتفق على حاجة واحدة ان الشتيمة حق لكل حد مضايقنى او مضايق اى حد  فى اى حاجة طبعا وفجأة تيجى محطتك اللى هتنزل فيها ويجى واحد يركب مكانك ويكمل حكاويك جرب تركب المترو فى يوم وحط الهاند فرى من غير ما تشغله وشوف هتسمع حكاوى اية يمكن تكون واقعة منى حكاوى تانيه كتير دى قلوب بتتكلم مش مجرد ناس راكبه المترو وبكدا توتا توتا خلصت الحدوتة .... " المترو حياه اللى فيها مش زى اللى براها ادخل جرب تعيش جو #يوميات_فى_مترو_مصر "  ويارب تعجبكم يارب 

ليست هناك تعليقات:

إرسال تعليق