الأحد، 13 أبريل 2014

16 / مش بالضرورى

مش بالضرورى لما اكون بتكلم لازم احسب كلامى ليه انت متفهمنيش
 مش بالضرورى لما ابقى متعصب تاخد كل الكلام عليك عارفك حساس بانت فاهمنى
مش بالضرورى نفكر بطريقة شمال ونبقى فاكرين كل الناس شمال
مش بالضرورى لما تلاقى حاجة بتحبها راحت منك يبقى الدنيا اتقفلت فى وشك لا يمكن ربنا شايلك حاجة احسن
مش بالضرورى تلاقى كل الناس عاوزة منك حاجة او مصلحه يمكن بيسأل عليك كدا فعلا
مش بالضرورى تتدخل فى اللى ملكش فيه يمكن تيجى تقول كلمة خير تلبسك اى حد فى الحيط
مش بالضرورى اللى خايف عليك بزعيق بيكرهك ما يمكن دا اسلوب خوفه
مش بالضرورى لما مديرك يزعلك تقفل يومك افرح وفكك
مش بالضرورى لما تسألنى ومحكيش يبقى انا مش بحبك لا يمكن مش عايز اشيلك فوق طاقتك اصل البنى ادم طاقات
مش بالضرورى نعمل ثورة تانيه ويموت ناس تانيه يمكن قربنا ننسى اسمائهم  والنفوس زى ما هى متصلحتش
مش بالضرورى نقفل يومنا عشان ناس متستهلش       
مش بالضرورى تبقى مخنوق من اى حاجة فى اى حاجة لما ممكن تديها بلح
مش بالضرورى كل احلامك تتحقق بس كفاية انك قادر تحلم
مش بالضرورى تبقى عايز تلم كل حاجة بتحبها فى مكان واحد كفاية حاجة او اتنين يغنوك عن اى حاجة
مش بالضرورى تبقى ناجح فى شغلك على حساب حياتك الشخصية خليك فى الوسط
مش بالضرورى تعمل الغريب عن الناس عشان تلفت الانظار ليك بشتيمة او غيره لمجرد انك مختلف
مش بالضرورى تبقى عصبى وفى النهاية انت بس اللى هتعانى من عصبيتك
مش بالضرورى تدور على الحب هو هيجيلك لحد عندك اصل اللى بيحيك هيدور عليك
مش بالضرورى تعيش وحيد دور حواليك هتلاقى ناس بتحبك كتير
مش بالضرورى تبقى مغرور عشان من تواضع لله رفعه وهتقابل مشاكل كتير
مش بالضرورى تبقى على تويتر وفيش بشخصية وفى الواقع بشخصية كدا هتتعب اوى
مش بالضرورى تبقى معارض او مؤيد فى النهاية كله لمصلحه بلدك بس اللى مش ضرورى عصبيتك ونرفزتك
مش بالضرورى تبقى فاهم فى السياسة او تتكلم فيها كتير دى حتى بتاخر العمر وبتجيب اكتئاب
مش بالضرورى تتكلم كتير عشان تدارى اللى جواك لما ممكن تختصر وتحكى اللى جواك على طول
مش بالضرورى تلف وتدور لما ممكن تجيب من الاخر عشان لا تتعب نفسك ولا تتعب حد معاك
مش بالضرورى تكتم غيرتك لما ممكن تطلعها وتنفخ حبيبك ماهو حقك
مش بالضرورى تحب 100 واحدة عشان تبقى ولد برنس لما ممكن تكتفى بواحدة تعوضك عن مليون بنت
مش بالضرورى تلعب ببنات الناس أصلها داين تدان
مش بالضرورى تعادى الناس عشان فاكر نفسك صح مايمكن المرة دى انت غلطان بس مش حاسيس
مش بالضرورى تظلم حد عشان مصلحتك ولا حتى تبقى مظلوم عشان تبان كويس

مش بالضرورى تقرأ كلامى ما يمكن مالوش لازمة #ديسو 

هناك 5 تعليقات:

  1. كﻻم زي الفل لو عملنا بيه الدنيا هتختلف معانا ومع غيرنا

    ردحذف
  2. بالظبط شكرا لحضرتك على القراءة

    ردحذف
  3. كلام جمييل بصراحه بس اللى يفهم ويعمل بيه

    ردحذف
  4. المشكله ان كل اللي مش ضروري عندنا ضروري والعكس صحيح للاسف وده اللي مودينا في داهيه

    ردحذف